Archive | November 2015

Die Lady en die Leeu

WILD (5)

Die lank verwagte Lady en die Leeu is hier, en ek vlieg hoog vandag. Ek het my mikpunt van twee boeke vir 2015 gehaal. Dis ‘n heerlike gevoel van bevryding en tevredenheid met ‘n taak welgedaan. Dis die verhaal van Madelie en haar Leeu en die fyn voetwerk om die verkryging en die behoud van die liefde.

Sinopsis

Madelie Marais is ’n uitstekende privaatverpleegster wat deur haar Agentskap toegewys word aan ’n welaf pasiënt wat voltydse sorg nodig het. Die voorwaarde is egter dat sy haar intrek onder die dak van die onvoorspelbare en baie aantreklike Pierre du Toit neem.

Daar is egter ’n probleem en dis nie die werk nie. Dis die man, want Pierre lyk nie net soos ’n leeu nie, hy weet ook waarna hy soek – ’n ma vir sy vierjarige seun en ’n vrou vir sy huis. Sy oog is op sy prooi en haar naam is Madelie. Maar hierdie bokkie is vlug van voet en wakker genoeg om nie weer in ’n strik te trap nie. Sy het haar immers een keer in ’n wip laat vang. Maar sy het haar misreken met die leeu en die stryd om behoud van haar hart het begin.

Die boek sal hopelik teen die einde van November in die boekwinkels beskikbaar wees, so hou maar die spasie dop vir die skakels as jy jouself of iemand anders wil bederf vir Kersfees.

Daar is ook heelwat ander e-boeke by https://rachelledubois.com/nuwe-boeke/ beskikbaar as jy lus voel om te gaan kyk.

Ek hoor graag wat jy dink van die omslag? Ek het ‘n soektog gehad na iets wat sal pas by die storie en hierdie een het vir my goed gelyk. Hoe voel jy daaroor?

Gesels gerus saam op Facebook of op Twitter by @RachelleRomance

Resensies:

“Hierdie lekkerlees verhaal gaan beslis baie harte steel. Dis ’n pragtige, pragtige boek.”

Louise Viljoen

“Dis ’n baie, baie goeie boek. Die karakters is goed ontwikkel en die verhaal is goed geskryf en lekker om te lees.”

Johan Beukes

 

Droogte van die gees

images[8]

Droogte op aarde is erg. Dit laat geen lewe onaangeraak nie. Elke gras spriet, elke plant, mens en dier is bewus van die dorheid, van die smagting van die aarde na lewegewende water. Droogte se uitwerking op mens en dier is wyd bekend – sonder water kan daar nie lewe wees nie.

Maar die droogte van die gees is erger.

Die krake van dorheid en die uitgestrekte vlaktes vol niks maak daaglikse bestaan ʼn worsteling. Dis dan, wanneer niks die gees meer voed nie, dat die taaiste groeisels vatplek kry in die woesteny. Dan spruit die onkruid van venyn, afgunstigheid, kleinsieligheid, na-ywer en veroordeling uit elke kraak en skiet soos bome die lug in. Want hierdie groeisels kan nêrens anders bestaan nie – net in die dor, uitgedroogde vlaktes van die verlate gees.

Venyn word ʼn boom, maar sy blare gee nie skadu nie, sy dorings skiet soos pyle in alle rigtings en hoe groter die wonde, hoe sterker groei die boom. Maar die wortels sprei ook diep onder die oppervlak in die eie gees en dien daar dieselfde wonde toe. So teer venyn op homself en vernietig stuk vir stuk die lewe tot dit van bitterheid en na-ywer sterf.

Afguns se grypende arms skuif stadig uit en oor die krake, ongesiens kruip dit deur elke kraak en rank alles en almal wat voorkom toe. Die arms krul versmorend om elke voorwerp en elke lewe tot dit stadig doodwurg in die greep wat ook om homself gedraai is.

Kleinsieligheid is subtiel en groei amper skelm uit die dor landskap se krake. Dit word ʼn bos wat bitter bessies dra en die wat dors is nader wink met skelm oë en soet woorde, net om dan veroordelend die afgedopte vrugte die landskap vol te slinger vir ander om te vertrap en te bespot.

Na-ywer kom stadig van onder die harde kors te voorskyn en maak duister skadukolle oral waar daar lig deur die wolke breek. Dit verduister en verdoesel, dit steek weg en vertrap, dit gryp en veroordeel. Dit vergruis en verbrysel tot die ewige skadu ook oor hom sprei en hy stadig opkrul in sy eie duisternis en vergaan.

Veroordeling skiet vinnig en sterk uit die droë barse en word ʼn boom met wortels diep en uitgesprei. Dit dra penne en dit sit die voorste plekke waar die liefde hoort; waar die vrede en begrip is spring dit op en vermoor goedheid, vergifnis, geduld. Die penne dring ook diep in die eie hart en die gif daarvan sak af tot in die wortels tot die eie gees stadig verskrompel en kragteloos teen die dors vergaan.

Mag die seën van die lewegewende reën ook op die uitgedorde gees val en ‘n woud van lig en liefde, vergifnis, aanvaarding en wysheid opspring uit die krake.

 

Hoe om jou boek te bemark

Skat van die Seerower Amazon 34df4949-cda6-4d5a-b5a5-6feca07a4995[1]

Jou boek is by die boekwinkels en nou moet dit bemark word. Niemand gaan die boek koop as hulle nie daarvan weet nie. Bekende skrywers begin hul boek bemark voor dit klaar geskryf is. Dit dwing jou om die boek te voltooi en sal moontlike lesers waarsku dat dit aan die kom is. Vir ʼn eerste poging is dit egter anders.

Jy gaan self ’n bemarkingsveldtog moet loods, en wees maar bereid om heelwat tyd hieraan te bestee.

Ek stel die volgende voor:

  • Begin jou eie blog of webwerf (ek weet nou nog nie wat die verskil is nie). Dit gaan jou geld kos, want jy moet registreer en ’n domein bekom. As jy dit nie self kan doen nie, gaan dit jou meer geld kos, maar dit is die moeite werd, want dit is waar jy jouself en jou boeke bekend gaan stel. Mense wil weet wie jy is en hulle wil oor jou en jou werk lees. Jou webtuiste sal jou in staat stel om inligting te deel en jy kan dit begin lank voor jy jou eerste boek klaar geskryf het. Woes kan hier baie help, want as jy as Premium+ lid registreer kry jy ook ʼn webwerf. Dis ook hier waar jy die skakels na die boekwinkels waar jou boek te koop is plaas saam met ‘n kort beskrywing en die voorblad van jou boek..
  • Gebruik LinkedIn as bemarkingsvoertuig. Dis heeltemal gratis en het geweldige reikwydte.
  • Skep vir jou ’n gratis professionele Facebook profiel. As jy reeds op Facebook is en resepte en geselsies deel, gaan dit nie werk nie. Jou vriende neem jou nie ernstig op nie. Hulle wil eerder weet wat jy die naweek gedoen het.
  • Begin jou nuus gratis op Twitter deel en heg ’n skakel aan na jou webtuiste, Facebook en LinkedIn. Moet nooit negatiewe goed oor ander skrywers op Twitter – of enige ander sosiale platform – kwytraak nie; dis uiters onprofessioneel en kan jou beeld skade aandoen.
  • Registreer gratis by Google+ en begin om vir jou ’n netwerk te bou. Jy kan hier gratis adverteer.
  • Jy kan ook deur Google Adwords ’n advertensieveldtog begin, maar dis duur.

Wees baie versigtig om sommer almal voor die voet as vriende te aanvaar. Lees eers oor hul agtergrond en kies mense wat binne die skrywers- en lesersgemeenskap val.

Bemarking neem ongeveer 30 – 50% van jou dag in beslag, so wees voorbereid om toegewyd te wees hiermee. Onthou dat bemarking daarop uit is om mense so lus te maak om jou boek te lees dat hulle voel hulle moet dit net koop.

Daar is baie goeie leesstof oor bemarking. Gaan soek self wat vir jou gaan werk en probeer dit, maar moenie tyd mors as iets nie vir jou werk nie. Wees slim genoeg om te laat gaan wat nie werk nie en jou tyd liewer aan effektiewe bemarkingsmetodes te wy. Nie alles wat ek hierbo genoem het, gaan dieselfde resultaat lewer nie. En jy gaan nie oornag bekend en beroemd word nie. Dit vat baie tyd, baie toewyding en baie, baie geduld.

Moenie opgee nie. Jy kan.

Die voorbereiding van jou boek vir die uitgee daarvan

Pippas well canstockphoto4393745

Jou manuskrip is gepoets tot hy blink en nou is jy gereed vir die volgende stap.  Besluit of jy die boek gaan laat druk, want dan moet die uitleg gedoen word. Ek kan Boutique Books aanbeveel hiervoor en jy kan hulle vind by http://www.boutiquebooks.co.za/. Hulle kan ook jou boek professioneel laat redigeer, jou voorblad ontwerp en dit omsit in e-boek vorm, maar dit gaan jou geld kos.

Vir e-boeke is dit makliker. Hier is die stappe wat jy moet volg:

  1. Verkry ʼn e-ISBN nommer by die Nasionale Biblioteek.
  2. Jou manuskrip is ʼn MS Word dokument, getik in Times New Roman .12
  3. Voor in die boek moet die titelblad verskyn
  1. Die volgende bladsy moet daarop volg: (Sien die voorbeeld hier onder)

© Jou naam 2015

DIE NAAM VAN DIE BOEK

eISBN nommer

Uitgegee deur ……… (sit jou naam hier in as uitgewer)

Jou posadres

jou e-pos adres

jou webwerf adres

Alle regte voorbehou. Geen gedeelte van hierdie publikasie mag sonder die skriftelike verlof van die uitgewer gereproduseer of in enige vorm deur elektroniese of meganiese middel weergegee word nie, hetsy deur fotokopiëring, skryf- of bandopname, of deur enige ander stelsel vir inligtingsbewaring en –ontsluiting.

  1. Dis altyd goed om ʼn kort beskrywing van jou storie voor in die boek te plaas, want by sommige boekwinkels kan jy deur die e-boek blaai (Amazon.com) en dan kan die leser ʼn idee kry van waaroor jou storie gaan.
  2. As jy reeds ander boeke geskryf het, kan jy dit heel agter in die manuskrip noem en ook waar dit verkrygbaar is.
  3. Verander jou manuskrip na A5 grootte
  4. Kry vir jou ʼn voorblad – ʼn gewone selfoonfoto nie gaan werk nie. Jy kan jou voorblad op Amazon.com ontwerp of op Canva.com. Onthou jou voorblad is die eerste ding waarna ʼn leser kyk en dan gaan hul na die kort beskrywing of die agterblad om te sien waaroor jou storie gaan.
  5. Skryf jou agterblad teks. Ek gebruik die sogenaamde “elevator pitch”. Jy moet in die tyd wat ʼn hysbak van bo tot onder ry, kan vertel waaroor jou boek gaan. Dit werk min of meer so:

Wie is jou heldin en wat doen sy (beroep). Toe gebeur die volgende, en nou . . .

  1. Jy het nou jou voorblad, jy het jou kort beskrywing, jy het jou manuskrip in die regte grootte. Jy is nou gereed om jou boek self op Amazon.com te laai, want jy het reeds voorheen gaan kyk hoe werk hul Kindle Direct Publishing. Jy het geregistreer as verkoper en jy verstaan die konsep van bemarking deur Amazon.com.
  2. Jy is Afrikaanssprekend en wil liewer jou boeke in Suid-Afrika ook bemark. Jy kan die boek op die rakke kry deur die volgende verspreiders te gebruik:
    1. Andre Beukes by http://myafrikraans.com
    2. Anita Stander by http://www.kwartsbookstore.co.za
    3. Christine Stuart by http://ereads.co.za
    4. Hulle het almal hulle eie reëls, maar hul plaas jou boek op hul eie webblad en versprei dit ook na boekwinkels. Jou e-boek is nou by die verspreiders en op pad na die winkelrakke.

Volgende week gesels ons oor Bemarking. Gaan kyk gerus by http://rachelledubois.com vir meer inligting.