Archives

Die Lucerna Faktor nou beskikbaar

DIE LUCERNA FAKTOR

Falco Scuro, die Donker Valk, keer ná ʼn besoek aan die Ryk van Sapientia terug na Lucerna. Die Ryk van Lig is egter in duisternis gehul nadat die bose Timor van Falsum vir Lucerna aangeval en die Ligblom uit die Sfeer van Lig gesteel het. Lucerna, die Lamp van die Heelal, is nou byna onsigbaar, bewolk en vol skaduwees.

Falco Scuro verklaar terstond oorlog teen die bose Timor. Hy en sy Ligvalke moet ten alle koste die Ligblom terugkry in Lucerna. Indien die Lig nie skyn nie, kan Lucerna nie lig aan die ander ryke voorsien nie. Dan sal die Waarheid nie meer seëvier nie en die Leuen sal gedy. Die ryke sal in totale chaos en algehele donkerte verval en die inwoners sal uiteindelik sterf.

Die lig het nie net uit Lucerna verdwyn nie, maar ook uit Falco Scuro uit. Hoe het hy hier gekom? By hierdie punt waar hy so verdwaal het in sy eie donkerte?

Sal die Donker Valk daarin slaag om van die troebelheid binne-in homself ontslae te raak? Sal hy die skone Clara Lux, die Draer van Lig, wat die sleutel tot die raaisel hou, kan oortuig om vir altyd by hom op Lucerna te kom woon?

Lesersopinie deur Louise Viljoen:

Rachelle du Bois doen dit weer! Hierdie talentvolle skrywer se 13de eBoek, Die Lucerna Faktor, die tweede boek in die opwindende Faktor-fantasiereeks, is binnekort te koop.

Du Bois se verbeelding ken geen perke nie. Haar verhale is skoon, propvol avontuur, malse humor, liefde en heerlike fantasie. Ondersteun gerus hierdie onafhanklike skrywer. Afrikaans kan doen met skrywers soos sy.

Hier volg ʼn paar proetjies uit Die Lucerna Faktor:

Uittreksel:

“Klompies klein, knikkende kopbeentjies met klappende kakebene en knopperige knieë hardloop met litterige lyfies aan losserige lasse die hele Tenebris vol. Timor vryf verward oor sy ken en druk sy hand teen sy voorkop. Miskien is hy koorsig? Maar nee, sy voorkop is koel. Word hy dan nou stapelgek? Waar kom die spul grillerige geraamtetjies vandaan? Hy gil geskok toe van hulle op hom afstorm en hul ratelende tande in sy maer kuite inslaan. Hy spring en klap, trap hoog en laag, maar die benerige vingertjies gryp en klou vir ʼn vale.”

Uittreksel:

“Sy haal diep asem, word stil, roerloos, terwyl sy haar wortels uitstoot in die sagte, diep vrugbaarheid van die Aarde in. Sy lig haar arms en die groen sap van die lewe styg in haar lyf op tot sy ʼn stam vorm. Haar arms word sagte groen spriete en haar hande verander in teer nuwe blare wat stadig oopvou.

Daar vorm ʼn klein bloeisel, eers byna onsigbaar. Dit word groter, tot een vir een wasagtige blaar oopvou óm die sysagte kroonblare wat skitterend oopkelk asof daar ʼn lig van binne skyn. Die blom verhelder steeds tot kleurvolle, glansende spirale stadig daarom kolk en die hele reënwoud naderhand lyk asof dit deur die noorderligte verlig word.

Die skouspel duur nie lank nie. Die Lig verdof stadig, misterieus, tot net klein ligpuntjies meteens swiepende in die rondte tol in ʼn mal dans van kleurstrepe teen die donker.”

Uittreksel:

“Die slagslaners slaan op tromme, terwyl hulle kleurvolle pruike in alle windrigtings swaai. Snaarplukkers leun in ekstase agteroor tot hulle koppe byna aan die grond raak, terwyl die instrumente in hul benerige hande grom, huil en bewe. Die agtergrondkwakers het elkeen ʼn stormbord waarop hulle met kort stokkies tik. Voor elkeen is daar ʼn klankversterker wat hulle gille tot by die laaste linie van die verslae besoekers en deelnemers aan die Spele laat trek. Dan val die skreeubekke weg; hulle hardloop heen en weer, trippel, gil en skreeu by ronde bolle in wat op stokkies gemonteer is.”

Die boek is nou by Amazon.com beskikbaar. Klik net op die skakel hieronder.

https://www.amazon.com/dp/B01FUNBS5C

Die Lucerna Faktor

DIE LUCERNA FAKTOR

Die laaste paragraaf is geskryf en die laaste punt getik. Die warboel van emosies spoel heerlik oor my. Verskoon my as ek van pure lekkerte behaaglik agteroor sit en breed glimlag. Ek’s so opgewonde oor hierdie nuwe boekie in die Faktor reeks. Dis ook ‘n fantasie roman en is die tweede in die reeks.

Die groot werk van redigeer en proeflees lê nou voor. Eers wanneer Lucerna blink soos die maan, sal sy haar volledige verskyning maak. Tot dan moet ons geduldig wees.

Hier is so ‘n kykie na waaroor die storie gaan:

Falco Scuro keer na ‘n besoek aan die Ryk van Sapientia terug na Lucerna, sy Ryk van Lig. Hy vind dit in duisternis na die bose Timor van Falsum vir Lucerna aangeval en die Ligblom uit die Sfeer van Lig gesteel het. Lucerna is die Lamp van die Heelal wat nou byna onsigbaar, bewolk en vol skaduwees daar uitsien. Falco moet ten alle koste die Ligblom terug kry in Lucerna. Hy verklaar oorlog teen Timor, maar hy vind uit dat daar ander faktore is wat sy soektog na die Ligblom bemoeilik.

Die lig het nie net uit Lucerna verdwyn nie, maar ook uit hom uit. Hoe het hy hier gekom? By hierdie punt waar hy so verdwaal het in sy eie donkerte?

Sal Falco daarin slaag om van sy eie troebelheid ontslae te raak? En sal hy die skone Clara Lux, wat die sleutel tot die raaisel hou, kan oortuig om hom te vergesel na Lucerna?

DIE VITA FAKTOR nou beskikbaar

Die Vita Faktor

Marcus de Virtus voer ʼn rustige bestaan as ʼn suksesvolle kunstenaar op die dorpie Duiwelspiek in die ooste van Mpumalanga. Op ‘n dag ry ʼn taxi hom raak in die straat voor sy ateljee. Wanneer hy sy bewussyn in die hospitaal herwin, ontdek hy tot sy skok en ontsteltenis dat hy oor die vermoë beskik om onsigbaar te raak. Nog vreemde dinge gebeur met hom.

Daar is ʼn misterieuse vrou by sy bed met opvallende oë wat net soos syne lyk. Amandelvormige viooltjieblou oë. Presies nes syne. Wie is hierdie vrou met haar goue hare en geheimsinnige optrede? Sy oorreed hom om saam met haar te gaan. Sy neem hom op ʼn reis wat sy lewe handomkeer verander.

Die Vita Faktor neem oor en Marcus bevind homself meteens in twee wêrelde. Hy is nie meer seker wie of wat hy is nie. Sy alleen kan die raaisel van die Vita Faktor ontsluit, en hy moet haar noodgedwonge volg om ’n verklaring te vind vir die skokkende en ontstellende gebeure wat sy lewe oorgeneem het.

Is hy van sy sinne beroof of is daar waarlik iets meer, iets buite hierdie oomblik, asemteug, plek en tyd?

Die eerste kommentaar op DIE VITA FAKTOR. Ek het die proef kopie aan drie lesers gegee en hierdie is hul mening:

Ek het onlangs Rachelle du Bois se heerlike debuut-fantasieverhaal, Die Vita Faktor, wat deur Thompson Boekdrukkery uitgegee word, gelees en baie geniet. Die skryfster se verbeelding ken geen perke nie en sy gaan so gemaklik met die genre om dat mens sou dink sy is ‘n ou hand as dit by die skryf van fantasie kom. Dis ‘n voorreg om ‘n fantasieverhaal in Afrikaans te kan lees en ek hoop die skryfster kry die ondersteuning én erkenning wat sy verdien. Ek glo sy gaan ‘n hele klomp aanhangers werf. Ek is ook verheug om te verneem dat Die Vita Faktor die eerste boek in ‘n reeks is. Ek gaan beslis op die uitkyk wees vir die daaropvolgende boeke ook.

Louise Viljoen

“Baie dankie vir die lees van die boek. Dis anders maar tog baie interessant! Iets ongewoon en anders as die normale. Het die boek werklik geniet!” skryf Sanet Horn Rautenbach

“Dis ‘n vreeslike oulike boek en ek het dit baie geniet. Dit lees so maklik en ek kan dit hartlik aanbeveel,” is die mening van Suzette Grové

Die boek is nou beskikbaar by:

Sagteband:
eBoek:

 

Afrifiksie is ‘n Afrikaanse webwerf en hulle konsentreer spesifiek op die bevordering Afrikaanse wetenskapfiksie en fantasie. Gaan loer gerus by hulle in.

Gaan lees solank die lusmaker hier: http://afrifiksie.com/lusmaker-die-vita-faktor.

Thompsons Boekdrukkery gee die boek uit en jy kan hulle hier besoek:

http://thompsonboeke.com/index.php

DIE VITA FAKTOR

Snail 10470891_841198432622509_2594558303180483519_n

Daar is so baie werk aan die skryf en uitgee van ‘n boek. ‘n Skrywer moet baie geduldig wees. Niks mag deurgejaag word of half gedoen word nie. Dit vat tyd en geduld voor die boek uiteindelik in die lesers se hande beland. En dan kom die afwagting, die opwinding van iets nuuts, van ‘n nuwe storie met interessante karakters en baie kinkels en draaie voor die verhaal eindelik tot ‘n einde kom. Hopelik is die leser spyt as die einde van die boek op hande is, en nog beter is dit as die leser die boek liefdevol oor die buiteblad stryk en vergenoeg neersit.

‘n Skrywer begeer niks meer  of niks minder nie. Ek hoop dat Die Vita Faktor jou met genoegdoening en tevredenheid sal laat en ook sal laat uitsien na die volgende in Die Faktor reeks. Ek is reeds besig met Die Lucerna Faktor en ek glo jy gaan dit net so geniet soos hierdie eerste poging van my. Die boeke gaan in gedrukte vorm en ook as e-boek beskikbaar wees.

Ek is so bevoorreg om die eerste lesersopinie oor my nuwe WF/Fantasie, Die Vita faktor, hier te kan plaas. Ek sien uit daarna om die proef kopie in my hande te hou. Een van die dae, een van die dae …

Kort Leseropinie – DIE VITA FAKTOR

Ek het onlangs Rachelle du Bois se heerlike debuut-fantasieverhaal, Die Vita Faktor, wat deur Thompson Boekdrukkery uitgegee word, gelees en baie geniet. Die skryfster se verbeelding ken geen perke nie en sy gaan so gemaklik met die genre om dat mens sou dink sy is ‘n ou hand as dit by die skryf van fantasie kom. Dis ‘n voorreg om ‘n fantasieverhaal in Afrikaans te kan lees en ek hoop die skryfster kry die ondersteuning én erkenning wat sy verdien. Ek glo sy gaan ‘n hele klomp aanhangers werf. Ek is ook verheug om te verneem dat Die Vita Faktor die eerste boek in ‘n reeks is. Ek gaan beslis op die uitkyk wees vir die daaropvolgende boeke ook.

Louise Viljoen

 

 

Heel nuut & heel anders: Die Vita Faktor

Die Vita Faktor .jpg

Hierdie jaar laat nie op hom wag nie en tyd hardloop alweer soos water deur ‘n mens se vingers. En saam met die haas kom daar wonderlike dinge op my pad. Ek kry onverwags goeie nuus van Thompson Boekdrukkery (http://www.thompsonboeke.com/ / http://www.afrifiksie.com/) oor my nuutste boek in die fantasie genre, Die Vita Faktor. Ek glo die boek sal binne die volgende paar weke sy verskyning maak. Dis heeltemal ‘n nuwe rigting vir my, maar ek het my gate uit geniet met die skryf hiervan. Hou maar hierdie spasie dop vir meer nuus hieroor.

Dis ‘n lekker storie oor Marcus de Winter, die bekende en suksesvolle kunstenaar op die dorpie Duiwelspiek wat een oggend in die hospitaal wakker word na ‘n taxi hom omtrent op sy stoep raakgery het. Hy vind dat hy skielik anders is: hy raak onsigbaar en verskyn weer, hy kyk goed stukkend . . . Hy verstaan niks van wat gebeur het nie en hy wil niks daarvan weet nie. En die beeldskone vrou langs sy bed? Feia Custos vertel vir hom sy is sy buurvrou en die eienares van die koffiewinkel langs sy ateljee. Maar sy is anders en hy voel hy ken haar al het hy haar nog nooit voorheen gesien nie. Dis ‘n storie vol intrige en kinkels en onverwagte verskynsels. En natuurlik is daar die bose Timor van die Ryk van Falsum wat ten alle koste vir Marcus wil terugkry.

Dink aan die moontlikhede . . .

Think Possibilities 10491994_571903722914001_6734294162770169401_n

Ek het my hand aan Wetenskapfiksie gewaag en met hierdie nuwe boek vorendag gekom. Hou saam met my duime vas vir:

DIE VITA FAKTOR

Marcus de Virtus voer ʼn rustige bestaan as ʼn suksesvolle kunstenaar op die dorpie Duiwelspiek in die ooste van Mpumalanga. Op ‘n dag ry ʼn taxi hom raak in die straat voor sy ateljee. Wanneer hy sy bewussyn in die hospitaal herwin, ontdek hy tot sy skok en ontsteltenis dat hy oor die vermoë beskik om onsigbaar te raak. Nog ander vreemde dinge gebeur met hom.

Daar is ʼn misterieuse vrou by sy bed met opvallende oë wat net soos syne lyk. Amandelvormige viooltjie-blou oë. Presies nes syne. Wie is hierdie vrou met haar goue hare en geheimsinnige optrede? Sy oorreed hom om saam met haar te gaan. Sy neem hom op ʼn reis wat sy lewe handomkeer verander.

Die Vita Faktor neem oor en Marcus bevind homself meteens in twee wêrelde. Hy is nie meer seker wie of wat hy is nie. Sy alleen kan die raaisel van die Vita Faktor ontsluit, en hy moet haar noodgedwonge volg om ’n verklaring te vind vir die skokkende en ontstellende gebeure wat sy lewe oorgeneem het.

Is ek dapper of onnosel? Ek weet nie, maar ek het gewaag.