Tag Archive | avontuur

Medisyne vir die verdwaaldes

Roeiboot in stil water 10610627_1522495954656377_8649637274352178189_n

Soms loop ons radeloos en stoei met ʼn verlepte gees. Ons is meteens swerwers in ’n vreemde land, sonder aanwysers op onbekende paaie. Ons soek na ons spesiale rusplek om ʼn wyle daar te vertoef tot ons weer verkwik na siel en liggaam, en met nuwe lewenslus die pad vorentoe kan aandurf.

Daar’s boeke by hierdie rusplek. Dis die hart se biblioteek waar ons ons geliefdes vind. Waar ons telkens omhels word deur die bekende en ook die onbekende. Waar ons nader gewink word deur allerhande beloftes van nuwe wêrelde en ervarings. Dis daar waar die arms van ons gunstelingskrywers- en boeke ons verwelkom.

As ons slim is, skuif ons die stoel reg, en verruil dan hierdie uur, of twee, of drie, of sommer die hele dag, vir ʼn reis saam na die lewens, die liefde en die avonture van ander.

In die bladsye van ʼn boek beleef ons dalk weer dít waarvan ons al vergeet het. Word ons dalk weer opnuut bewus gemaak van die wysheid en die waarheid, die skoonheid en die wonder van die lewe waarin ons ons bevind.

O, daar’s soveel vreugde in die bladsye van ʼn boek! Dit is medisyne vir die verdwaaldes.

 

 

Die vreugde van sukses

Omnibus 2.jpg        Omnibus 1

Ek het die afgelope tyd gewerk aan twee klein versamelings van my vroegste boeke en dit saamgevoeg in Omnibus 1 en 2. Elkeen bevat drie boeke en ek kon tot my groot vreugde en genoegdoening self die inhoudsopgawe by elkeen inwerk.

Dit was nie net lekker om te sien hoe die boeke skaars op die winkelrak geland het voor dit opgeraap is nie. Ook die suksesvolle samestelling van die twee bundels, saam met die gemak van klik op ‘n boek se naam of hoofstuk  wat jou reguit soontoe neem, was vir my opwindend en baie bevredigend.

Ek het iets nuuts geleer en ek het dit self gedoen.

Natuurlik moes my ander werk eers wag tot ek hierdie belangrike projek voltooi het, maar die tyd wat ek opgeoffer het om die leser se gemaklike beweging binne elke versameling te verseker, het daarvoor vergoed.

Ek beplan om elkeen van my  bestaande boeke so met ‘n inhoudsopgawe met skakels toe te rus net soos dit in al die ander Kindle boeke gedoen is. Ek hoop om ook die gedeelte  agter in die boek waar die leser sterre toeken in te sluit, maar dis ‘n avontuur vir later.

Ek is so bly dat julle my boeke koop en lees. Ek sien dit aan die grafiek wat vir ons skrywers beskikbaar gemaak word deur Amazon.com. Ek is dankbaar vir elke paar oë en elke hart wat saam met my die vreugde van ‘n boek ervaar.

Geniet die boeke en gaan loer gerus hier in:

OMNIBUS 1

https://www.amazon.com/OMNIBUS/dp/B01GQLU3YO/

OMNIBUS 2

https://www.amazon.com/OMNIBUS/dp/B01GSMOA40/

Die voorbereiding van jou boek vir die uitgee daarvan

Pippas well canstockphoto4393745

Jou manuskrip is gepoets tot hy blink en nou is jy gereed vir die volgende stap.  Besluit of jy die boek gaan laat druk, want dan moet die uitleg gedoen word. Ek kan Boutique Books aanbeveel hiervoor en jy kan hulle vind by http://www.boutiquebooks.co.za/. Hulle kan ook jou boek professioneel laat redigeer, jou voorblad ontwerp en dit omsit in e-boek vorm, maar dit gaan jou geld kos.

Vir e-boeke is dit makliker. Hier is die stappe wat jy moet volg:

  1. Verkry ʼn e-ISBN nommer by die Nasionale Biblioteek.
  2. Jou manuskrip is ʼn MS Word dokument, getik in Times New Roman .12
  3. Voor in die boek moet die titelblad verskyn
  1. Die volgende bladsy moet daarop volg: (Sien die voorbeeld hier onder)

© Jou naam 2015

DIE NAAM VAN DIE BOEK

eISBN nommer

Uitgegee deur ……… (sit jou naam hier in as uitgewer)

Jou posadres

jou e-pos adres

jou webwerf adres

Alle regte voorbehou. Geen gedeelte van hierdie publikasie mag sonder die skriftelike verlof van die uitgewer gereproduseer of in enige vorm deur elektroniese of meganiese middel weergegee word nie, hetsy deur fotokopiëring, skryf- of bandopname, of deur enige ander stelsel vir inligtingsbewaring en –ontsluiting.

  1. Dis altyd goed om ʼn kort beskrywing van jou storie voor in die boek te plaas, want by sommige boekwinkels kan jy deur die e-boek blaai (Amazon.com) en dan kan die leser ʼn idee kry van waaroor jou storie gaan.
  2. As jy reeds ander boeke geskryf het, kan jy dit heel agter in die manuskrip noem en ook waar dit verkrygbaar is.
  3. Verander jou manuskrip na A5 grootte
  4. Kry vir jou ʼn voorblad – ʼn gewone selfoonfoto nie gaan werk nie. Jy kan jou voorblad op Amazon.com ontwerp of op Canva.com. Onthou jou voorblad is die eerste ding waarna ʼn leser kyk en dan gaan hul na die kort beskrywing of die agterblad om te sien waaroor jou storie gaan.
  5. Skryf jou agterblad teks. Ek gebruik die sogenaamde “elevator pitch”. Jy moet in die tyd wat ʼn hysbak van bo tot onder ry, kan vertel waaroor jou boek gaan. Dit werk min of meer so:

Wie is jou heldin en wat doen sy (beroep). Toe gebeur die volgende, en nou . . .

  1. Jy het nou jou voorblad, jy het jou kort beskrywing, jy het jou manuskrip in die regte grootte. Jy is nou gereed om jou boek self op Amazon.com te laai, want jy het reeds voorheen gaan kyk hoe werk hul Kindle Direct Publishing. Jy het geregistreer as verkoper en jy verstaan die konsep van bemarking deur Amazon.com.
  2. Jy is Afrikaanssprekend en wil liewer jou boeke in Suid-Afrika ook bemark. Jy kan die boek op die rakke kry deur die volgende verspreiders te gebruik:
    1. Andre Beukes by http://myafrikraans.com
    2. Anita Stander by http://www.kwartsbookstore.co.za
    3. Christine Stuart by http://ereads.co.za
    4. Hulle het almal hulle eie reëls, maar hul plaas jou boek op hul eie webblad en versprei dit ook na boekwinkels. Jou e-boek is nou by die verspreiders en op pad na die winkelrakke.

Volgende week gesels ons oor Bemarking. Gaan kyk gerus by http://rachelledubois.com vir meer inligting.

Jy wil ’n boek skryf, maar . . .

Inge Kindle Cover f47e8290-c806-45cf-ac43-6f9e7b6ad723[1]

Jy wil ’n boek skryf, maar waar en hoe begin jy? In hierdie gedeelte gaan ons by die begin begin. Heel voor.

  1. Jy moet eerstens weet in watter genre jy wil skryf. Daar word onderskeid gemaak in genrefiksie :
  • Misdaadfiksie
  • Fantasie
  • Wetenskapfiksie
  • Rillers
  •  Romantiese ontspanningsfiksie – romanse en liefdesromans verskil van mekaar
  • Historiese romans
  • Chick-lit
  • Christelike romans

Kinder-en jeugboeke

Poësie

Gaan lees meer hieroor in Die Afrikaanse Skryfgids –  saamgestel deur Riana Scheepers en Leti Kleyn.

  1. Skep ’n raamwerk vir jou storie met die volgende kolomme:

Hoofkarakter/s – hier skryf jy alles oor jou hoofkarakter neer.

Subkarakters – Doen dieselfde vir soos bo vir elke subkarakter en maak  seker dat jy weet watter rol hy/sy/hulle gaan speel in die storie. Hoe meer karakters hoe meer verwikkeld raak jou storie en hoe meer moet jy kophou.

Plek waar jou storie afspeel – Land, dorp, stad, ens.

Tyd as dit nodig is, bv. vir ’n historiese roman – jaar. Let op na jou seisoene.

Hoekom is ’n raamwerk nodig?

  • Jy leer jou karakters ken. Jy moet hulle soos die palm van jou hand ken, elkeen van hulle – waarvan hulle hou, wat hulle haat, wat hulle dryf, waar hulle vandaan kom, waar hulle woon en werk, hoe hulle grootgeword het, wie belangrik was in hul vroeër jare, wat hul beroep is, waarheen hulle mik, waaroor hulle droom, wat keer of weerhou hulle daarvan om hul droom te bereik, vir wie is hulle lief, hoe lyk hulle, wat haat hulle, wat irriteer hulle, ens.Jy kan nie met halfgebakte karakters ’n storie skep nie. Jy gaan in elkeen van hulle se kop inklim en hulle word terwyl jy skryf. Jy gaan dink, doen, sê, voel, ruik, sien, hoor en proe wat hulle dink, doen, sê, voel, ruik, sien, hoor en proe.
  • Dit skep vir jou ’n prentjie van die mense waaroor jou storie gaan
  • Dit sê vir jou teen watter agtergrond jou storie afspeel
  • Dit sê vir jou waar en wanneer jou storie afspeel
  • Dit skep die ruggraat van jou storie – jy moet weet waar wil jy met die storie heen
  • Dis ’n uiters belangrike verwysingsdokument – dit sal bv. keer dat jy jou hoofkarakter nie aan die begin van jou storie Piet Vermaak noem en later deur die storie Peet Veldskoen nie. Dit sal keer dat jy nie sê die storie speel in Braamfontein af maar later word dit Bloemfontein nie.
  1. Besluit hoe lank jou boek gaan wees – kyk op die internet na kort stories, romans, sagas, ens. Daar is klaarblyklik nie eenstemmigheid oor die hoeveelheid woorde nie. Tradisionele uitgewers soos Lapa Uitgewers vereis bv. 44000 woorde vir hul Romanza reeks en 70000 of meer woorde vir ’n roman, maar daar bestaan nie konsensus oor lengte nie. Jy kan dus jou boek so lank of so kort maak as wat jy wil omdat jy dit self gaan uitgee.
  2. Skryf. Jou woordeboek (HAT, Die Afrikaanse Woordelys en Spelreëls) is langs jou op jou tafel, want jy kan nie ’n storie skryf wat vol spel- en taalfoute is nie.
  • Waaroor gaan jou storie?
  • Oor wie gaan jou storie?
  • Wat gebeur hier?
  • Dis belangrik dat jy van die begin af let op die tegniese aspekte van jou dokument:
  • Skryf altyd op A4 grootte
  • Skryf in Times New Roman .12pt font
  • Skryf in dubbelspasiëring
  • Moenie jou dokument “format” nie.
  • Begin elke eerste paragraaf van ’n hoofstuk teen die kantlyn en  keep van daar af elke daaropvolgende paragraaf in tot aan die einde van die hoofstuk.
  • Gebruik die Ascii tabel vir kappies, deeltekens, koppeltekens, ens. Jy sal dit gratis van die internet kan aflaai. E-boeke vereis dit.
  • Jy kan regmaak soos wat jy skryf of jy kan dit los tot jy die stuk klaar geskryf het. Ek verkies om reg te maak soos wat ek skryf.
  • Maak tyd om te skryf, verkieslik dieselfde tyd elke dag.
  • Skryf elke dag ten minste 1000 woorde.
  • Kry vir jou ’n plek waar dit stil en rustig is en waar jy kan konsentreer.
  • Maak klaar waarmee jy begin het.
  • Lees

Lees en verstaan die genre waarin jy wil skryf. Daar is uitstekende boeke wat maklik verstaanbaar is. Ek beveel die volgende boeke aan vir romantiese ontspanningsfiksie:

Writing fiction for Dummies – Randy Ingermanson & Peter Economy

Writing a Romantic Novel – Donna Baker

Dis uiters belangrik dat jy boeke gaan lees oor hoe om te skryf.  Daar is baie uitstekende boeke oor hoe om te skryf. Ek beveel die volgende boeke aan:

Die Afrikaanse Skryfgids –  saamgestel deur Riana Scheepers en Leti Kleyn

How to structure your novel – K M Weiland

Write your novel from the middle – James Scot Bell

Besoek die webwerwe van bekende uitgewers soos Lapa, Human en Rousseau, NB Uitgewers, en vergewis jouself van hul vereistes. Al gaan jy jou boek self uitgee, is daar universeel aanvaarde reëls by die skryf van boeke.

Lees alles wat jy in die hande kan kry. Lees die boeke van skrywers wat skryf wat jy wil skryf.

  • Kyk wat skryf hulle.
  • Kyk hoe skryf hulle.
  • Kyk na hul taalgebruik – jy wil ’n kwaliteit produk op die rak sit, nie een wat in SMS taal geskryf is nie.
  • Kyk hoe lyk hul voorblaaie.
  • Kyk na die agterbladteks want jy gaan dit nodig kry vir jou eie boek.
  1. Besluit of jy die boek wil laat druk. Vind solank uit wat dit sal kos. Onthou dat jy jou boek self wil uitgee en dit sluit bemarking en verspreiding in. As jy die boek laat druk, sal jy dit self moet versprei. Is jy bereid om die ekstra tyd en geld aan bestellings en posgeld te spandeer? Volgende week: Jou manuskrip is nou klaar geskryf; maar hoe nou verder?
  2. Vra jouself die vraag: wat gaan met die harde boeke gebeur as jou boek nie verkoop nie?

‘n Storie vertrek

Pippas well canstockphoto4393745

Nou dat jy weg is

uit my hande

uit my gedagtes

uitgeskryf op ‘n skerm

laat ek jou gaan

om in iemand anders se kop

nes te maak vir ‘n ruk

En ek bly agter

met ’n groot stilte

waar jy voorheen was

Dan kom die volgende storie

stuk-stuk by my aan

en skrop nes

so begin die siklus

hom weer herhaal

en gee ek my gewillig

aan die nuwe verhaal

se genade oor

So, jy het ‘n boek geskryf . . .

canstockphoto7959079

So, jy het ‘n boek geskryf

Jy het dit na drie of meer uitgewers gestuur in die hoop dat hulle sou belangstel om dit uit te gee. In jou geestesoog het jy gesien hoe jou boek in sy pragtige omslag op die winkelrakke pryk. Jy het maande lank hoopvol gewag, die pos dopgehou.

Dis nou een jaar en etlike maande later. Al drie die uitgewers het jou manuskrip afgekeur en nou lê dit en stof vergaar iewers in ’n laai. Jy verstaan nie hoekom nie – jou ma het gesê dis pragtig, jou vrou/man dink jy’s ’n ster, jou boeties en sussies spog oor hul skrywer broer/suster. Maar jy is moedeloos en dink aan opgee, want as jy goed geskryf het, sou hulle mos jou storie aanvaar het vir publikasie, dan nie? Jy gaan nooit jou boek in jou hande hou of in die e-boekwinkels sien nie. Sug.

Verkeerd.

  • Jy kan deesdae ‘n boek skryf, laat proeflees/beta-lees/redigeer en self uitgee.
  • Jy kan dit so vining of so tydsaam doen as wat jy wil en jy wag vir niemand nie.
  • Die tegnologie het self-publikasie moontik gemaak en vandag kan enige skrywer ’n boek skryf, dit self uitgee, en dit by ’n boekwinkel soos Amazon.com verkoop.
  • Dit is selfs moontlik om jou boeke by al die Suid-Afrikaanse boekwinkels te plaas.
  • Dis ’n nuwe manier van boeke skryf en verkoop en het die buitelandse markte op hol.
  • Skrywers wag nou nie meer vir toestemming om te skryf en hul stories te verkoop nie. Hulle doen dit self.

Hou die volgende in gedagte as jy onafhanklik wil skryf en self wil uitgee:

  • Baie tyd, toewyding, self-dissipline en vasbyt is nodig.
  • Wees gereed vir baie ure se sit voor die rekenaar om jou storie uit jou kop uit op die rekenaarskerm te kry.
  • Sukses kom nie oornag nie.
  • Maak seker jou verhaal is goed geskryf, met geloofwaardige karakters, ’n sterk storielyn, sterk dialoog en vloeiende narratief. Lees, lees, lees ander skrywers se boeke; leer van hulle.
  • Moenie die fout maak om te dink jy kan ’n leser flous met ’n minderwaardige produk nie. Jou boek moet blink soos die son voor hy winkel toe gaan.
  • Jy moet jou eie werk doen – hierdie manier van boeke skryf en uitgee is baie nuut in Suid-Afrika en skrywers moet die geleentheid aangryp om so vining moontlik soveel moontlik boeke te skryf en in die winkels te kry.
  • Jy sal jou eie bemarkingsveldtog moet loods tensy jy iemand wil huur om dit vir jou te doen.
  • Jy het ’n webwerf nodig en tensy jy geld beskikbaar het, gaan jy dit self moet ontwerp.
  • Jy moet jou eie boek in ’n e-boek omskep wat op alle tablette gelees kan word.
  • Jy moet besluit of jy harde kopieë van jou boek wil laat druk. Dis baie duur en die boek moet op een of ander manier versprei word. E-boeke kos niks om uit te gee nie.
  • Moenie dink jy gaan oornag ryk word nie. Lesers moet eers van jou weet voor hulle jou boeke koop en as jou boek van goeie gehalte is, sal hulle weer jou boeke koop en ook vir ander daarvan vertel.
  • Moenie ontmoedig raak nie. Die eerste probeerslag is nooit die beste nie, maar soos met alle dinge, moet jy eers kruip voor jy kan loop.
  • As jy nie ander boeke lees oor hoe om te skryf nie, sal jy nie weet hoe nie en gaan lesers nie jou boeke koop en lees nie.

Dit kan verseker gedoen word volgens een skrywer wat reeds elf boeke geskryf en self uitgegee het.

As jy egter voel jy wil eerder die tradisionele pad volg en jou naam in koerantopskrifte sien, dan is die groot uitgewers vir jou. Jy moet kennis neem dat uitgewers (bv. Lapa, NB Uitgewers, Human & Rousseau, ens.) honderde manuskripte moet keur. Hulle is besige mense met baie streng vereistes waaraan tot die letter voldoen moet word en as jy nie vooraf uitgevind het wat hul van jou wil hê nie, sal hulle jou manuskrip afkeur.

Uiteindelik is die Seerower klaar en daar …

Skat van die Seerower Amazon 34df4949-cda6-4d5a-b5a5-6feca07a4995[1]

My nuutste breinkind is eindelik uit my hande en in die hande van die verspreiders. SKAT VAN DIE SEEROWER sal eersdaags te kry wees op die webwerwe van die meeste boekwinkels in Suid-Afrika. Wees op die uitkyk vir hierdie heerlike avontuur wat hom afspeel in die jaar 1845. Améli du Pré en Vianne du Buisson is op ‘n belangrike sending per skip van Frankryk af na Engeland op pad. Améli het ’n kosbare skat in haar besit wat veilig in Engeland besorg moet word. Dis egter nie so maklik nie, want hul skip, Du Vent, word deur twee Franse edelmanne, Jean le Veque en sy vriend André le Mon, onderskep in ’n poging om te keer dat die skat in Engeland beland, want dit is die eiendom van die Le Veque-familie. Die mans is vasbeslote om dit terug te neem na Chateau le Veque in Nantes, Frankryk. Sal Améli en Vianne die sending suksesvol voltooi, of gaan die mans hul planne in die wiele ry?

Hierdie is ’n avontuur vol vreemde gebeurtenisse, swaardgevegte, skelmstreke, humor en ’n goeie skoot romanse met ‘n verrassende einde.

Dis ‘n romanse vir tieners (en vir almal wat soos tieners voel maar nie meer is nie … ) Gaan lees gerus wat lesers oor die boek te sê het by https://rachelledubois.com/nuwe-boeke/

Die boek kos R70.00 en is reeds beskikbaar by:

http://ereads.co.za/product/skat-van-die-seerower/