Tag Archive | gedigte

Die vroue van Paradys

Die vroue van Paradys

Hierdie boek vertel die storie van die helende krag van die liefde. Soms gebeur daar dinge waarvoor ons nie ʼn verklaring het nie. Ons is geneig om dit te ontken, weg te wens, te onderdruk, selfs om ons daarteen te verset.

Dit help alles niks, want, soos die Bybel sê, daar is ʼn tyd vir alles onder die son.

Die liefde bepaal sy eie tyd en kies die harte wat waardig genoeg is om dit te ontvang.

Die liefde soek die Vroue van Bergh Paradys in hierdie verhaal op. Riana, Elma en Inge Bergh bevind hulle onverwags op ongewone terrein; díe van onsekerheid, verwarring en vreemde verlange na ’n onbekende iets. Hul manlike bure word telkens oor hul pad gestuur sonder dat hulle of die vroue daarvoor soek. Hulle is skielik in mekaar se geselskap, in mekaar se hare, in mekaar se harte.

Vir Inge Bergh en André Grobler verloop die pad na mekaar toe deur diep valleie en hoë berge. Hulle bly die ontwykende antwoord najaag tot die stem van die stilte eindelik harder spreek as hul teenkanting teen mekaar. Eers toe hulle besef dat dit waarvoor André in die stilte wag, reeds daar is, kom ook die besef dat die stem van die liefde die sagter een is, maar aanhoudend roep tot die hart die fluistering in die stilte herken.

Die liefde laat hom nie aanjaag nie, en laat hom nie uitsluit nie, al druk jy jou ore toe en al sluit jy jou oë daarteen.

Hierdie mooi boek is by Amazon.com en ook nou vir die eerste keer in Suid-Afrika beskikbaar by die volgende skakels:

http://www.amazon.com/dp/B00QH7DDHM

‘n Storie vertrek

Pippas well canstockphoto4393745

Nou dat jy weg is

uit my hande

uit my gedagtes

uitgeskryf op ‘n skerm

laat ek jou gaan

om in iemand anders se kop

nes te maak vir ‘n ruk

En ek bly agter

met ’n groot stilte

waar jy voorheen was

Dan kom die volgende storie

stuk-stuk by my aan

en skrop nes

so begin die siklus

hom weer herhaal

en gee ek my gewillig

aan die nuwe verhaal

se genade oor

Wat nie gesê word nie

Pearls canstockphoto6111406

Siekte dwing mens soms bed toe. Dis natuurlik ’n plek wat mens nie sommer andersins gewillig deur die dag opsoek nie. Tensy jy ’n boek het. Dit dwing jou tot stilte en refleksie. Dis dan wanneer ek my digbundels nader trek en stilte soek in woorde. In stiltes tussen woorde, in stiltes agter woorde, in wat nie gesê word nie. Dan soek ek en ek vind diep versteekte pêrels. ’n Skat wat ek sorgvuldig toevou en veilig wegsit om later weer na terug te keer. En elke keer vind ek meer van die kosbare juwele.

Hoe heerlik en bevrydend is ’n mooi gedig, ’n pragtige vers, ’n hartspraak deur die digter wat iets te sê het. Ek hoor, ek luister fyn, met die hart, met oog en oor. Ek is weereens verryk en ek koester die wete dat ek my besig gehou het met iets wat my skatkis voller maak. Daar is altyd plek vir meer vreugde en lig, meer skoonheid.

Want alles wat mooi en goed en opbouend is, is skoonheid. My soeke daarna is my lewensreis.

Ek plaas graag hierdie gedig van Jan de Bruyn vir jou:

Ek stuur vir jou

– behalwe groete –

alles wat ek sonder antwoord sê,

alles wat ek met die ver hande

van my oë pluk:

die wit blomme wolke

in ’n blou vlei;

die varings van stilte

wat in die berge van die jare groei.

Ek stuur vir jou ook

’n handvol van ’n môre hier

om teen jou oor te hou

soos ’n skulp

as die dae aanhou knars.

En ek stuur vir jou

die son die rooi lemoen

wat ek opgetel het

net anderkant vandag

net duskant die nag

vir lig om te drink

as ’n vaal reën aanhou val.

Dronk van skoonheid

Ou boeke Facebook10256949_495859730515867_6730570642721716078_n[1]

Ons stap meestal by die seëninge op ons pad verby. Ons is bewus van die behoefte om iets te doen, iewers heen te gaan, die natuur op te soek, musiek te luister, met iemand te gaan gesels, of ʼn boek te lees wat jy so lankal wou.

As jy sou doen wat jou hart vir jou sê, nee, waarvoor jou hart pleit, wag daar ʼn stortvloed van seën op jou. Ja, ek gebruik die woord seën by gebrek aan ʼn meer toepaslike beskrywing van dit wat in jou hart invloei, en jou heeltemal onverhoeds betrap. Dis iets wat jou walle laat oorstoom, jou beker vul tot oorlopens toe, en jou stil en verwonderd laat. Dan wonder jy hoekom jy so lank uitgestel het.

Ek het gister ʼn boek gelees wat my so onkant betrap het dat ek nou nog steier onder die impak daarvan. As jy nog nooit ʼn boek gelees het wat met jou gepraat, en jou ten diepste geraak het nie, kyk jy die seën mis op die pad waarlangs jy loop. So ʼn boek gooi horisonne vir jou oop, en laat jou wonder of jy ooit voorheen geleef het.

Boeke hou boodskappe vir die hart, daarom is dit my skatkis waaruit ek weer en weer put sonder om ooit versadig te word. By elke keer se lees vind ek weer iets nuut, en word ek weer stil om te wonder oor die skoonheid van woorde en die kuns van storie vertel.

Ek begeer daardie kuns, maar meer nog, begeer ek al daardie boekseëninge wat langs die pad vir my wag. Ek sal van nou af met groot afwagting en oop oë loop sodat ek niks mis nie, want om ʼn seën mis te loop, is om bewusteloos te lewe.

Ek ek wil voluit lewe.

Lelani – om voor te begin en oor te begin (nuut)

Lelani Kwarts Cover

Hierdie is die verhaal van oor begin en voor begin na gesinsgeweld twee jong mense se lewens amper vernietig.

Die pragtige Lelani Botha en haar broer Chris besluit om vir hulle ʼn nuwe lewe te skep na ʼn insident by hul ouerhuis wat hul tot in hul diepste wese ruk. Hulle besluit om die bouvallige kliphuis langs die spruit op haar pa se kleinhoewe op te knap en daar in vrede te gaan woon.

Lelani voel teen haar sin aangetrokke tot hul  buurman, Leon Postma, en bied hewig weerstand teen haar groeiende liefde vir hierdie stil, sterk man, want sy vertrou geen man behalwe haar broer Chris nie. Leon bou vir haar ʼn brug na hom toe oor die spruit tussen hul eie en sy grond, en sy moet kies of sy gaan luister na haar hart, en of sy gaan bly glo dat mans nie te vertrou is nie. Hoekom voel dit dan vir haar asof haar asem saam met hom wegloop toe hy oor die brug verdwyn na sy hom met haar skerp tong bygekom het? Hy het vir haar ʼn ultimatum gestel en sy moet kies.

Sy en Chris word weer stadig mens, en hulle vind uit dat die liefde en goedheid alles oorwin; selfs die intense wantroue en die pyn van verwerping. Die vermoë om te buig maar nooit te breek nie; die keuse om te bly staan ten spyte van hul omstandighede is ʼn wilsbesluit. Hulle sal regop staan en reguit kyk sonder verskoning vir wie hulle is of waar hulle vandaan kom.

Hierdie boek word deur Kwarts Publishers uitgegee as ‘n e-boek en sal eersdaags beskikbaar wees. Ek sal die skakels plaas sodra dit beskikbaar is. Hou hierdie spasie dop.

Die dans van die reën

Rain 2 images[10]

O die dans van ons Suster!

Eers oor die bergtop loer sy skelm,

en haar oge is skaam; en sy lag saggies

En van ver af wink sy met die een hand;

haar armbande blink en haar krale skitter;

saggies roep sy.

Sy vertel die winde van die dans en sy nooi hulle uit,

want die werf is wyd en die bruilof groot.

Die grootwild jaag uit die vlakte,

hulle dam op die bulttop,

wyd rek hulle die neusgate

en hulle sluk die wind; en hulle buk,

om haar fyn spore op die sand te sien.

Die kleinvolk diep onder die grond hoor die sleep van haar voete,

en hulle kruip nader en sing saggies:

“Ons Suster! Ons Suster! Jy het gekom! Jy het gekom!”

En haar krale skud,

en haar koperringe blink in die wegraak van die son.

Op haar voorkop is die vuurpluim van die berggier;

sy trap af van die hoogte;

sy sprei die vaal karos met altwee arms uit;

die asem van die wind raak weg.

O, die dans van ons Suster!

Eugene Marais