Tag Archive | lewe

Medisyne vir die verdwaaldes

Roeiboot in stil water 10610627_1522495954656377_8649637274352178189_n

Soms loop ons radeloos en stoei met ʼn verlepte gees. Ons is meteens swerwers in ’n vreemde land, sonder aanwysers op onbekende paaie. Ons soek na ons spesiale rusplek om ʼn wyle daar te vertoef tot ons weer verkwik na siel en liggaam, en met nuwe lewenslus die pad vorentoe kan aandurf.

Daar’s boeke by hierdie rusplek. Dis die hart se biblioteek waar ons ons geliefdes vind. Waar ons telkens omhels word deur die bekende en ook die onbekende. Waar ons nader gewink word deur allerhande beloftes van nuwe wêrelde en ervarings. Dis daar waar die arms van ons gunstelingskrywers- en boeke ons verwelkom.

As ons slim is, skuif ons die stoel reg, en verruil dan hierdie uur, of twee, of drie, of sommer die hele dag, vir ʼn reis saam na die lewens, die liefde en die avonture van ander.

In die bladsye van ʼn boek beleef ons dalk weer dít waarvan ons al vergeet het. Word ons dalk weer opnuut bewus gemaak van die wysheid en die waarheid, die skoonheid en die wonder van die lewe waarin ons ons bevind.

O, daar’s soveel vreugde in die bladsye van ʼn boek! Dit is medisyne vir die verdwaaldes.

 

 

Tuiste vir my Hart

Tuiste vir my Hart 2

Tuiste vir my Hart, die tweede boek in die Fynbos-reeks, volg kort op die hakke van Kwiksilwer – Boek 1. Hierdie is die verhaal van Mitzi en Daniel, twee mense wat afsonderlik op reis is na die liefde. Dit neem hulle met ompaaie, deur berge en dale, deur donker en lig om tot die kern daarvan deur te dring. In die proses leer hulle dat die liefde so maklik is, maar nooit eenvoudig nie. Dit kan nie vasgehou of ingeperk word nie en slegs as dit toegelaat word om vryelik te vloei, loop dit die hele wese vol. Eers dan is dit volbring.

Mitzi Botha bedank haar werk in Randburg en vertrek na George in die Wes-Kaap om daar ‘n pos as bestuurder van die nog onklaar Fynbos Boetiekhotel te aanvaar. Die eiendom behoort aan haar vriendin, Theana Brandt, en die restoureerder van Fynbos se gebou is Daniel Brandt. Mitzi slaan sy voete onder hom uit toe sy op die lughawe aankom saam met haar kat Rigoletto. Hy wil haar hê, maar sy wil niks met hom te doen hê nie. Haar waaksame en versigtige houding skrik Daniel egter nie af nie en hy neem hom voor om uit te vind waarvan sy vlug en vir wie sy wegkruip. Hy sal nie rus voor hy nie haar geheim ken nie, want miskien sal hy haar dan verstaan.

Die uitpluis van die raaisel skud vir hom en Mitzi tot in hul fondamente. Sal sy hom kan vergewe vir dit wat hy sonder haar toestemming weet? Sal sy weet hoe om lief te hê?

Sal Daniel kan saamleef met dit wat hy van haar weet?

Die liefde is sy eie leermeester.

Die boek is nou beskikbaar by:

https://www.amazon.com/dp/B01KVLS0MC#nav-subnav

Die vroue van Paradys

Die vroue van Paradys

Hierdie boek vertel die storie van die helende krag van die liefde. Soms gebeur daar dinge waarvoor ons nie ʼn verklaring het nie. Ons is geneig om dit te ontken, weg te wens, te onderdruk, selfs om ons daarteen te verset.

Dit help alles niks, want, soos die Bybel sê, daar is ʼn tyd vir alles onder die son.

Die liefde bepaal sy eie tyd en kies die harte wat waardig genoeg is om dit te ontvang.

Die liefde soek die Vroue van Bergh Paradys in hierdie verhaal op. Riana, Elma en Inge Bergh bevind hulle onverwags op ongewone terrein; díe van onsekerheid, verwarring en vreemde verlange na ’n onbekende iets. Hul manlike bure word telkens oor hul pad gestuur sonder dat hulle of die vroue daarvoor soek. Hulle is skielik in mekaar se geselskap, in mekaar se hare, in mekaar se harte.

Vir Inge Bergh en André Grobler verloop die pad na mekaar toe deur diep valleie en hoë berge. Hulle bly die ontwykende antwoord najaag tot die stem van die stilte eindelik harder spreek as hul teenkanting teen mekaar. Eers toe hulle besef dat dit waarvoor André in die stilte wag, reeds daar is, kom ook die besef dat die stem van die liefde die sagter een is, maar aanhoudend roep tot die hart die fluistering in die stilte herken.

Die liefde laat hom nie aanjaag nie, en laat hom nie uitsluit nie, al druk jy jou ore toe en al sluit jy jou oë daarteen.

Hierdie mooi boek is by Amazon.com en ook nou vir die eerste keer in Suid-Afrika beskikbaar by die volgende skakels:

http://www.amazon.com/dp/B00QH7DDHM

‘n Tyd vir stilte

images[8]

Ek gaan hierdie Kerstyd gebruik om te reflekteer oor die jaar wat verby is en ook die jaar wat voorlê. Daar het so baie wonderlike dinge gebeur met my en myne hierdie jaar. Daar is ook die seer van ‘n ma aan die dood afstaan. Afgesien daarvan was 2015 weereens vir my ‘n hoogtepunt – ‘n jaar vol vreugde, liefde en vrede. Ook ‘n suksesvolle jaar omdat ek daarin geslaag het om my doelwit te behaal – om twee boeke vir 2015 te skryf en uit te gee. En nog lekkerder, ook ‘n derde boek, Die Vita Faktor, wat tans by die uitgewers is. Ek het waarlik baie om voor dankbaar te wees.


Kom ons oordink  hierdie jaar wat verby is. Kom ons kyk wat ons geleer het, wat ons ingesit het en wat ons uitgekry het. Kom ons sien uit na 2016 en besluit sommer nou al dat dit ‘n wonderlike gawe is wat ons kan vul met alles van ons keuse – vreugde, vrede, en liefde of angs, woede en bitterheid.

Waarmee gaan jy die gawe van tyd vul?

Ek kies die vreugde, vrede en liefde.  Ek wens dit vir elkeen van julle toe. In oorvloed.

Wees geseënd en hou die liefde lewendig.

Ons gesels weer in 2016.

Die Lady en die Leeu

WILD (5)

Die lank verwagte Lady en die Leeu is hier, en ek vlieg hoog vandag. Ek het my mikpunt van twee boeke vir 2015 gehaal. Dis ‘n heerlike gevoel van bevryding en tevredenheid met ‘n taak welgedaan. Dis die verhaal van Madelie en haar Leeu en die fyn voetwerk om die verkryging en die behoud van die liefde.

Sinopsis

Madelie Marais is ’n uitstekende privaatverpleegster wat deur haar Agentskap toegewys word aan ’n welaf pasiënt wat voltydse sorg nodig het. Die voorwaarde is egter dat sy haar intrek onder die dak van die onvoorspelbare en baie aantreklike Pierre du Toit neem.

Daar is egter ’n probleem en dis nie die werk nie. Dis die man, want Pierre lyk nie net soos ’n leeu nie, hy weet ook waarna hy soek – ’n ma vir sy vierjarige seun en ’n vrou vir sy huis. Sy oog is op sy prooi en haar naam is Madelie. Maar hierdie bokkie is vlug van voet en wakker genoeg om nie weer in ’n strik te trap nie. Sy het haar immers een keer in ’n wip laat vang. Maar sy het haar misreken met die leeu en die stryd om behoud van haar hart het begin.

Die boek sal hopelik teen die einde van November in die boekwinkels beskikbaar wees, so hou maar die spasie dop vir die skakels as jy jouself of iemand anders wil bederf vir Kersfees.

Daar is ook heelwat ander e-boeke by https://rachelledubois.com/nuwe-boeke/ beskikbaar as jy lus voel om te gaan kyk.

Ek hoor graag wat jy dink van die omslag? Ek het ‘n soektog gehad na iets wat sal pas by die storie en hierdie een het vir my goed gelyk. Hoe voel jy daaroor?

Gesels gerus saam op Facebook of op Twitter by @RachelleRomance

Resensies:

“Hierdie lekkerlees verhaal gaan beslis baie harte steel. Dis ’n pragtige, pragtige boek.”

Louise Viljoen

“Dis ’n baie, baie goeie boek. Die karakters is goed ontwikkel en die verhaal is goed geskryf en lekker om te lees.”

Johan Beukes

 

Die vasmeerplek

Roeiboot in stil water 10610627_1522495954656377_8649637274352178189_n

Dis soms so moeilik om jou plek weer te vind, veral as daar ontwrigting en groot verandering in jou lewe plaasgevind het. Dis nie vreemd om toe te gee aan die drang om jou kop toe te trek, oë toe te knyp, en net af en toe te loer of die woeste see om jou nou kalmer geword het nie. Dis selfbehoud wat jou so laat wegkruip, terwyl jy wag dat jou eens rustige boot wat nou wild op ʼn onbekende see dobber, na stiller waters vaar waar jy veilig genoeg voel om vas te meer. En om eers weer die begin van die kraaines van drade te kry sonder om skuldig te voel omdat dit so lank neem, omdat jy so nie weet nie, omdat jy onseker is oor of jy jou lewe weer aanmekaar geweef gaan kry.

Daar is ʼn bloudruk vir jou lewe. En ʼn kompas om die pad aan te dui. Ware Noord lê binne-in jou, en soos jou boot in ʼn stil plek vasgemeer lê, so moet jy terugkeer na die stil plek binne, daar waar rus is en waar jy antwoorde kry.

Eers dan kan jy begin aanstap na waar jy moet wees. Na die plek op jou bloudruk wat jy self gekies het, en jou kompas jou rigting aandui.

Swaelvlug

Swaeltjie

Die eerste verkenners het laat gistermiddag opgedaag. Hulle het ʼn kort entjie uitmekaar gaan sit en die een heel regs het eerste begin praat. Sy stem was aan my onbekend en dit was by die aanhoor van die vreemde, melodieuse fluit dat ek opgekyk het. Drie van hulle het in ʼn kort rytjie op die telefoondraad hoog bokant die grasperk gaan sit en na die bure se dak gekyk. Ek het asem opgehou, te bang om te roer vir ingeval hulle skrik en soos klein geveerde skaduwees die lug in verdwyn.

Hulle was onmiskenbaar met hul gevurkte sterte. Die eerste swaeltjies het gekom. Dit is te vroeg, het ek gedink op die voorlaaste dag van Januarie.

Het hulle net weer kom kyk of alles nog veilig is by die swerm se bymekaarkomplek voor hul lang vlug na die Noorde? Het hulle dalk kom kyk of hier dalk al ander wag? Maak hulle gereed om te vertrek?

Miskien ons kan ʼn vroeë winter verwag. Die seisoen draai reeds met korter dae en sagte skemer wat smiddae vroeër kom. Sou die eerste kosmos reeds skaam hul pienk en wit gesiggies wys tussen die lang gras?

Hoe mooi is die eindelose kom en gaan van die seisoene; die tydloosheid van  die ewig voorstuwende krag na die afsterwe van hierdie lewe en die daaropvolgende onkeerbare roering van die begin van ‘n nuwe lewe.

En die wonder van lewe en dood, begin en einde inherent in elke lewende wese wat deel is van die Skepping.

Laat ons onthou dat elke oomblik ʼn nuwe begin en die einde van die vorige is, dat elke asemteug ʼn begin en ʼn einde is.

En laat ons mooi oomblikke agterlaat.