Tag Archive | skryf

Die groot vraag

Writers block

Daar is een vraag wat elke skrywer moet vra en antwoord voor daar met ‘n nuwe boek begin word: wat is die kern van die storie, of dan nou, waaroor gaan die verhaal? Jy moet dit in een sin kan beskryf. Jy weet oor wie dit gaan; die hoofkarakters is aan jou goed bekend. Maar waaroor gaan die storie nou eintlik? Voor jy nie hierdie vraag kan antwoord nie sal jy aanhou skryf tot by ‘n punt en dan daar vashaak. ʼn Storie moet ʼn baie duidelike begin, middel en ʼn einde hê, en sonder ʼn baie duidelike kernprobleem of doelwit sal jou verhaal plat val.

Dis belangrik om eers mooi te dink oor die volgende vrae voor jy druk op jouself toepas en met ‘n halfgewaste storie vorendag kom:

  • Wie se storie is dit?
  • Wat gebeur hier?
  • Wat is op die spel vir die karakters, hul mense, hul omgewing?

Ek stel voor jy formuleer heel eerste die sinopsis – die kort beskrywing wat op die agterblad van jou boek gaan staan en jou boek gaan verkoop of nie. Dit moet ongeveer 250 – 300 woorde bevat. Jy moet dit in drie stappe kan vertel:

  • Wie is betrokke? Hier moet jy jou hoofkarakter kortliks bekend stel. Wie sy is, wat sy doen, ensovoorts
  • Wat? Wat gebeur toe wat dinge deurmekaarkrap?
  • En nou? Nou is daar moeilikheid (of dalk nie? Dit sal van jou storie afhang.)

Nou het jy klaar ’n idee van waaroor jou storie gaan. Die volgende stap in die uitpluis van jou kernprobleem is egter uiters belangrik. Ek stel voor dat jy so te werk gaan:

Skryf die spieëloomblik – dit is die toneel reg in die middel van die boek – die draaipunt. Dit is daardie punt waar die karakters te staan kom voor hul eie tekortkominge, waar hulle selfondersoek doen, wanneer hulle besef dat dinge nie is soos wat dit lyk of moet wees nie. Dis ʼn diep en emosionele ervaring as hulle agterkom dat iets sal moet verander, synde hulself of hul situasie. Dit moet die kruks van jou storie wees – die kern van jou verhaal. Dit is waaroor jou storie gaan. Jy moet hierdie kern kan bepaal voor jy wegval en skryf.

Ja, jy moet weet ongeveer hoe lank jou boek gaan wees en dit sal bepaal word deur die genre waarin jy wil skryf. Gaan doen maar bietjie navorsing oor die algemene riglyne en vereistes van die uitgewers, alhoewel dit vir my voorkom of daar nie regtig universele konsensus is oor presies hoe lank ʼn storie moet wees nie. (Aantal woorde.)

Nou kan jy by die eerste hoofstuk begin en dan stelselmatig na die draaipunt toe werk. Dit moet in elke hoofstuk opbou na die spieëloomblik toe. Van die middel af begin die konflik erger oplaai soos wat die karakters probeer om die probleem op te los. Wat is dit wat hul keer om hul doel te bereik? Jy kan maar so ʼn stok of twee in die speke steek om dinge interessant te hou en die konflik aan te blaas, maar dit moet volgehou word tot by die resolusie daarvan aan die einde van die storie.

Ek het nou met my sowel as met voornemende skrywers gepraat, want dit is waar ek myself op die oomblik bevind. Ek het die naam, die voorblad, die karakters, maar ek weet nie waaroor my storie gaan nie. Ek het dit al twee keer begin en gelos. Miskien sal my eie raad die hek waarvoor ek reeds te lank staan oop gooi en my deurlaat om die pad te begin stap saam met die interessante mense in die sesde boek van die Fynbos-reeks, Visioen van my Hart.

Kom ons skryf!

Rachelle

 

 

Die voorbereiding van jou boek vir die uitgee daarvan

Pippas well canstockphoto4393745

Jou manuskrip is gepoets tot hy blink en nou is jy gereed vir die volgende stap.  Besluit of jy die boek gaan laat druk, want dan moet die uitleg gedoen word. Ek kan Boutique Books aanbeveel hiervoor en jy kan hulle vind by http://www.boutiquebooks.co.za/. Hulle kan ook jou boek professioneel laat redigeer, jou voorblad ontwerp en dit omsit in e-boek vorm, maar dit gaan jou geld kos.

Vir e-boeke is dit makliker. Hier is die stappe wat jy moet volg:

  1. Verkry ʼn e-ISBN nommer by die Nasionale Biblioteek.
  2. Jou manuskrip is ʼn MS Word dokument, getik in Times New Roman .12
  3. Voor in die boek moet die titelblad verskyn
  1. Die volgende bladsy moet daarop volg: (Sien die voorbeeld hier onder)

© Jou naam 2015

DIE NAAM VAN DIE BOEK

eISBN nommer

Uitgegee deur ……… (sit jou naam hier in as uitgewer)

Jou posadres

jou e-pos adres

jou webwerf adres

Alle regte voorbehou. Geen gedeelte van hierdie publikasie mag sonder die skriftelike verlof van die uitgewer gereproduseer of in enige vorm deur elektroniese of meganiese middel weergegee word nie, hetsy deur fotokopiëring, skryf- of bandopname, of deur enige ander stelsel vir inligtingsbewaring en –ontsluiting.

  1. Dis altyd goed om ʼn kort beskrywing van jou storie voor in die boek te plaas, want by sommige boekwinkels kan jy deur die e-boek blaai (Amazon.com) en dan kan die leser ʼn idee kry van waaroor jou storie gaan.
  2. As jy reeds ander boeke geskryf het, kan jy dit heel agter in die manuskrip noem en ook waar dit verkrygbaar is.
  3. Verander jou manuskrip na A5 grootte
  4. Kry vir jou ʼn voorblad – ʼn gewone selfoonfoto nie gaan werk nie. Jy kan jou voorblad op Amazon.com ontwerp of op Canva.com. Onthou jou voorblad is die eerste ding waarna ʼn leser kyk en dan gaan hul na die kort beskrywing of die agterblad om te sien waaroor jou storie gaan.
  5. Skryf jou agterblad teks. Ek gebruik die sogenaamde “elevator pitch”. Jy moet in die tyd wat ʼn hysbak van bo tot onder ry, kan vertel waaroor jou boek gaan. Dit werk min of meer so:

Wie is jou heldin en wat doen sy (beroep). Toe gebeur die volgende, en nou . . .

  1. Jy het nou jou voorblad, jy het jou kort beskrywing, jy het jou manuskrip in die regte grootte. Jy is nou gereed om jou boek self op Amazon.com te laai, want jy het reeds voorheen gaan kyk hoe werk hul Kindle Direct Publishing. Jy het geregistreer as verkoper en jy verstaan die konsep van bemarking deur Amazon.com.
  2. Jy is Afrikaanssprekend en wil liewer jou boeke in Suid-Afrika ook bemark. Jy kan die boek op die rakke kry deur die volgende verspreiders te gebruik:
    1. Andre Beukes by http://myafrikraans.com
    2. Anita Stander by http://www.kwartsbookstore.co.za
    3. Christine Stuart by http://ereads.co.za
    4. Hulle het almal hulle eie reëls, maar hul plaas jou boek op hul eie webblad en versprei dit ook na boekwinkels. Jou e-boek is nou by die verspreiders en op pad na die winkelrakke.

Volgende week gesels ons oor Bemarking. Gaan kyk gerus by http://rachelledubois.com vir meer inligting.

Hoe het jy begin skryf?

canstockphoto7959079
Ek wil so graag ʼn boek skryf, hoor ek baiekeer van mense. En dan kom die vraag: hoe het jy begin?

Ek het net eendag gaan sit en begin skryf. Dit na jare, en letterlik duisende, boeke se lees. As ek sê duisende, dan bedoel ek duisende. Ek het begin lees toe ek tien jaar oud was, en het alles verslind waarop ek my hande kon lê. Engels sowel as Afrikaans.

Ek wou altyd skryf, en het altyd geskryf. Gediggies, versies, kort stukkies prosa.

Ek het later jare hardop gesê: Ek wil ʼn boek skryf. Dit was nie meer net ʼn droom nie, dit was ʼn drang.

Dit was eers in Julie 2013 dat ek my eerste boek,  Maandanser, aangepak het. Die meisie in die maanlig in Herman Jansen se tuin. Van Dirk en Denise en hul mooi liefde, van Trixie en haar speelmaat, die seun van hul buurman op die plaas, en van sy vreemde verandering. Want skielik is hy nie meer dieselfde nie. Hy is vreemd anders, en sy verstaan haarself nie meer nie.

En lag en ek huil terwyl ek skryf, want daar is humor en daar is trane terwyl my karakters leef. Ek voltooi die 47,963 woorde en stuur dit teen die einde van Augustus 2013 aan die uitgewer vir moontlike publikasie. Hulle laat weet dit sal vier maande neem voor ek van hulle sal hoor. So lank kan ek nie sit en niksdoen nie.

Hierdie boek is beskikbaar by:

http://www.amazon.com/s/ref=nb_sb_noss?url=search-alias%3Daps&field-keywords=rachelle%20du%20bois%20maandanser

http://ereads.co.za/category/authors/rachelle-du-bois

In die tussentyd begin ek skryf aan my tweede boek, Maalkolk. Ek skryf 34,161 woorde en voltooi die boek binne drie weke op 23 September 2013. Dis ʼn hartsboek, ʼn mooi boek wat die storie vertel van Madri en Deon, en hul liefde vir mekaar, maar die seer uit haar verlede staan tussen hulle. Dis ook die verhaal van Adele en Francois, van misverstand en begeerte wat later liefde word, van gee en neem.

Ek besluit om hierdie boek self uit te gee terwyl ek wag vir Maandanser, en ek laat dit professioneel redigeer en druk. Toe ek hierdie boek in my hande hou wou my hart bars van vreugde. Ek besluit om dit ook as e-boek beskikbaar te maak.

Die boek is beskikbaar by:

http://www.amazon.com/s/ref=nb_sb_noss?url=search-alias%3Daps&field-keywords=rachelle%20du%20bois%20maalkolk

http://ereads.co.za/category/authors/rachelle-du-bois

Ek begin dadelik hierna met my derde boek, Plek van die Flaminke, ʼn heerlike humoristiese verhaal oor die mense van die vakansieoord, Zeesig. Ek giggel en lag uit my maag terwyl ek skryf oor die dinge van Delia en die sexy Alex, oor sy stil, dodelik aantreklike broer Xander, wat die tjello en viool kan laat huil en jubel, en sy Madeleen. Van die stryd en die stoei om mekaar se harte en lywe. En ek jubel, want ek voltooi hierdie boek van 35,667 woorde aan die einde van Oktober 2013, en besluit om dit ook self uit te gee as e-boek terwyl ek wag vir Maandanser. Die boek was as vervolgverhaal beskikbaar op my webblad by http://rachelledubois.com.

Die boek is tans beskikbaar by:

http://www.amazon.com/s/ref=nb_sb_noss?url=search-alias%3Daps&field-keywords=rachelle%20du%20bois%20plek%20van%20die%20flaminke

http://ereads.co.za/category/authors/rachelle-du-bois

Teen 25 November 2014, het ek my vierde boek, Die Lied van Lorelei met sy 44,613 woorde klaar geskryf. Humor uit die boonste rakke, uit die maag lag vir die dinge van hierdie welaf sitrusboere in die noorde van Mpumalanga. Natuurlik is my helde sterk en sexy, en my heldinne pragtig en ook sexy, en hulle dans ʼn eierdans om mekaar, na hul jonger boeties ingryp en hul by Die Opsitkers inskryf.

Ek besluit om hierdie boek ook te laat redigeer en te laat druk. Ek gee dit self uit as boek en e-boek in Januarie, 2014. Weereens beleef ek die vreugde om my pragtige breinkind in my hande te hou.

Die boek is tans beskikbaar by:

http://www.amazon.com/s/ref=nb_sb_noss?url=search-alias%3Daps&field-keywords=rachelle%20du%20bois%20die+lied+van+Lorelei

http://ereads.co.za/category/authors/rachelle-du-bois

Intussen laat die uitgewer my weet Maandanser is afgekeur. Vier maande se wag verby. Maar ek leer uit wat hulle sê: my taal- en skryfvaardighede is goed, ek het beslis potensiaal as skrywer, maar ek vertel die storie, ek wys nie die emosie van my helde en heldinne nie. En, die boek is uit die held se oogpunt geskryf, en nie die heldin s’n soos hulle vereis nie. Ek lees al die inligting, en ek koop die boeke wat hul aanbeveel. Ek lees en ek leer, en ek skryf verder.

Teen die middel van Desember 2013, het ek my vyfde boek, Mari, met sy 45, 312 woorde klaar geskryf. Mari, vir wie Dewald liefgekry het die oomblik toe hy haar sien. Mari, wat stukkend weggevlug het uit ʼn huwelik wat haar nie net fisiek nie, maar ook emosioneel afgetakel het. En haar broer, Thinus, met die persblou oë soos die van sy sus. Thinus, wat glo dat sy omstandighede hom weerhou daarvan om die vrou wat hy liefhet, te gaan haal en haar syne te maak.

Ook hierdie boek het ek self uitgegee as e-boek en die boek is tans beskikbaar by:

http://www.amazon.com/s/ref=nb_sb_noss?url=search-alias%3Daps&field-keywords=rachelle%20du%20bois%20mari

http://ereads.co.za/category/authors/rachelle-du-bois

Ek skryf nou ernstiger boeke, oor die lewe, nie net oor die liefde nie, en ek put soveel bevrediging daaruit. Mense leef en kry seer, hul lag, en werk, hul dra mekaar, help mekaar, kry lief, en verloor. En deur dit alles speel die noodlot sy rol. My heldinne groei as mense, en my helde is sterk, maar deernisvol. Hulle staan sterk saam met die liefde van hul lewe en hul oorwin wat ookal op hul pad kom.

Ek begin dadelik werk aan die volgende boek. Ek stuur op 31 Desember 2013 my sesde boek, Lelani, met sy 44,000 woorde aan die uitgewers vir moontlike publikasie. Hulle erken ontvangs en laat weet hulle sal oor vier maande hul besluit bekend maak.

Intussen begin ek skryf aan Bergh Paradys (of Inge) en voltooi my sewende boek met sy 63, 536 woorde in Maart 2014, waarna ek dit ook aan dieselfde uitgewers stuur in die hoop dat hulle hierdie manuskrip sal aanvaar vir publikasie.

Ek hoor na amper vyf maande (Mei 2014) van die uitgewers dat Lelani afgekeur is. Hierdie keer het my boek darem tot by die manuskripverwerker gevorder, maar dis die verkeerde genre. Dit moet onder die liefdesroman ingedeel word. Die heldin se pyn en leed pas nie in die genre van romanse nie. Romanse is ʼn soort van “hit en run” affêre wat geen ernstige lewensvraagstukke of die heldin se groei as mens aanraak nie. Die lewe is die domein van die liefdesroman.

Dis my domein. Dis wat ek wil skryf.

Ek besluit om Lelani aan ‘n ander uitgewer te stuur en ek hoor op 14 Oktober 2014 dat hulle die manuskrip aanvaar vir publikasie. Hopelik sal hierdie pragtige boek wat  die volgende kommentaar uitgelok het, voor die einde van November 2014 beskikbaar wees op bekende boekwinkels se rake:

’n Passievolle verhaal wat mooi uitgebeeld word deur die skrywer. Die taalgebruik in die boek is goed, met interessante  verwysings na bekende digters se werke, wat baie goed by die storie inpas. Die verskeie karakters in die boek word geloofwaardig uitgebeeld. Dit is ‘n lekker lees verhaal, wat die leser se aandag sal hou tot die einde. Dit is ‘n liefdesnovelle wat baie goed in die genre slaag.”

Ek onttrek Bergh Paradys omdat ek vermoed dis ook die verkeerde genre, en stuur dit in Julie 2014 na ʼn ander uitgewer. Ek merk dit duidelik as ʼn liefdesroman. Ek wag om in November 2014 van hulle te hoor. Vier maande se wag.

Intussen val ek weg met my agtste boek, my eerste Engelse roman, genaamd Pippa’s Story met sy 65,987 woorde. Ek voltooi hierdie heerlike boek op 5 Augustus 2014 en kry dit op 21 Augustus 2014 terug van die Engelse redakteur af. Dit word aanvaar deur Kwarts Publishers en is vanaf 13 Oktober 2014, as e-boek beskikbaar by die skakels hieronder.. My hart swel van vreugde en as ek ʼn ballon was, het ek nou hoog gesweef. Die kommentaar van die uitgewer was:

“I loved the way the author used vivid descriptions of nature, the farm and some of the scenes where people interact with each other. There is a fresh and original feel in some of the chapters which I enjoyed. She also kept the suspense around the ‘secret of the key’ lovely till the end. I also loved the happy ending.”

Dis ʼn mooi boek, en ek het sonder om een keer te wonder waarheen nou, geskryf tot ek klaar was. Die boek het ook as vervolgverhaal op my Engelse webblad by http://rachelleduboisenglish14.com verskyn.

Die boek is tans beskikbaar by:

http://www.kalahari.com/eBooks/Pippa-s-Story-eBook_p_49782861

http://www.kwarts.co.za/E-Books/tabid/95/CategoryID/0/Level/a/ProductID/5404/Default.aspx?txtSearch=pippa%27s+story&SortField=ProductName%2cFree2

http://www.leisurebooks.com/Product/ProductDetail/856497

Op 10 Augustus 2014 begin ek werk aan my negende boek, en tweede Engelse liefdesroman genaamd Eve Vermont. Ek voltooi dit op 28 September 2014, en stuur dit  na die redigeerder. Ek hoop om dit teen die middel van Oktober terug te kry vir korreksies. En dan….. die publikasie!  Dis ʼn prag boek, ‘n seer boek, ʼn bly boek, ʼn vreugdevolle lewensboek. En ek huil terwyl ek skryf, want ek lewe soos wat Eve Vermont lewe.

Ek het reeds begin skryf aan my tiende storie, ‘n opvolgboek vir Eve Vermont, genaamd Oak Seed. Die eerste tien hoofstukke is reeds klaar gekryf. En ek is opgewonde en bly, want dit gaan ‘n mooi boek wees.

Is ek tevrede met wat ek vermag het in die jaar vanaf Augustus 2013 tot vandag, 22 Augustus 2014? Ek dink so. Diep tevrede en baie dankbaar, want ek het agt boeke wat die moeite werd is om te koop en te lees, geskryf, waarvan sewe reeds uitgegee is en beskikbaar is as e-boeke.

Is ek klaar met Afrikaans? Nee, ek sal nooit klaar wees met my taal nie, en die volgende Afrikaanse boek se saad het al ontkiem in my kop. Die storie lê en wag, maar eers moet ek klaarspeel met die skone Eve Vermont.

My raad aan voornemende skrywers is om allereers te gaan kyk na wat jy wil skryf. Gaan lees boeke oor die onderwerpe. Kyk hoe skryf die skrywers, wat skryf hulle. Lees boeke oor hoe om te skryf, daar is baie op die mark.

En dan plaas jy jou op jou stoel voor jou rekenaar neer, en skryf. Skryf net. Begin net en skryf alles wat in jou kop kom. Dis oefening. Maak vir jou ʼn raamwerk waaroor jou storie gaan, en gaan doen navorsing oor jou onderwerp. Ken jou karakters, weet wie hulle is.

Praat met my. Ek hoor graag wat jy dink as jy reeds van my boeke gelees het of sal wil lees.